མེ་འབར་བའི་རྨི་ལམ།

མེ་འབར་བའི་རྨི་ལམ།


                                            རྩེ་སྲས་ཨ་རྡོ། (རྨ་ལྷོ)
སྒྱུ་མའི་རུས་པ་རླུང་གིས་འཆའ་བའི་དགུན་ཁ
ངས་རང་ཉིད་བོར་ཞིང་སྙན་ངག་རྙེད་པའི་ནམ་གུང
ཡང་ན  བུ་མོ་ཞིག་གི་མཚན་མ་ལས་ལྷུང་བའི
འཁྲུལ་བའི་གསེང་གི་ཤེས་རབ་དང་སྲེད་པ་འདྲེས་པའི་དབྱངས་རྟ་ཚོམ་བུ
མེ་འོད་ལྗང་ཁུའི་ནང་གི
འདྲེ་སྒྲུང་ནག་པོ

འཆི་བའི་ཕམ་ཉེས་ཀྱིས་མནར་ཞིང་གསོན་པའི་སྙིང་ཉེ་དེས
མདང་ནུབ་ང་ཡི་རྨི་ལམ་གྱི་ཤ་དྲོད་ཕྱེད་ཀར་བཏང་ཞིང
གངས་འདབས་འདིའི་བྱ་རྒོད་ཀྱི་གཤོག་པར་མིག་ཆུས་བྲབས་པའི་སྡུག་བསྔལ་
     རབས་དང་རིམ་པས
ང་ཡི་སེམས་ནད་ལ་བྱིལ་བྱིལ་བྱས་མྱོང

ཐག་པ་ཞིག་ལ་བརྒྱུས་པའི་གཏམ་རྒྱུད་ཀྱི་ཤ་དང་ཁྲག་དམར
ལོ་ཟླའི་ཨུ་ཚུགས་ཀྱིས་མ་ཞུ་བའི་རྣོ་ལྕགས་གསེང་གི་རྡོ་མཁར་དང་ཉི་མའི་
     སྒྱུ་འཕྲུལ་གྱི་རྐང་ལག་འགུལ་ཐེངས་གཅིག་གིས
ང་ཡི་ནང་སེམས་ཀྱི་བརྩེ་བ་རེ་རེའི་ཁ་དོག་བཤིག་སོང

ཆང་ཕོར་དུ་བླུགས་པའི་མི་ཚེའི་གླུ་གཞས་ཁ་ཤས
ངས་དོ་ནུབ་ཀྱི་སྨག་རིམ་འདིའི་ཆེས་གཏིང་ས་ཡིན་ན་བསམ
ཡིན་ཡང  ལོ་རྒྱུས་ལས་ཀྱང་རིང་བའི་སྙན་ངག་གི་ཐ་སྙད་རབ་རིབ
རྨི་ལམ་གྱི་སྒལ་རུས་ལས་འབར་ཞིང
ཡིག་འབྲུས་སྲེག་པའི་རུས་སྒྲོམ་ནང་གི་ཁེར་ལབ་རིང་མོས
ཁྱོད་ལ་འཆི་བའི་གསོལ་སྟོན་སྒྲིག་ཡོད་ཨང

ང་ཡི་སྣང་སྟོང་སྒྱུ་མའི་ཁུད་ཀྱི
རྟོགས་པའི་ལྷ་དང་ལྷ་མོ