དུར་སྲི། (ལན་གྲུ)
གལ་ཏེ གལ་ཏེ་ཞེས་པ་ཞིག་ཡོད་ན
ངས་འདས་ཟིན་པའི་དུས་ཚོད་ཀྱི་ལྟེབ་ཁུགས་ནས
ལམ་འཛོལ་སོང་བའི་བུ་མོ་རེ་རེ་ཕྱིར་བླངས་ནས
མཇལ་འཛོམ་གྱི་དུས་ཆད་བྱེད་འདོད
གལ་ཏེ གལ་ཏེ་ཞེས་པ་ཞིག་ཡོད་ན
ང་རང་མིག་གིས་ཟིན་མཐའ་བྲལ་བའི་རྒྱང་རིང་དུ་མི་འཕུར་བར
ཉེ་གམ་གྱི་ཁོ་མོའི་ནགས་ཚལ་དུ་བབས་ནས་གནས་ཚང་བཅའ་ངེས
གལ་ཏེ གལ་ཏེ་ཞེས་པ་ཞིག་ཡོད་ན
ངས་སྐྱོ་གདུང་གིས་བྲིས་པའི་འཕྲིན་པ་ཡོད་ཚད་ཕྱིར་བསྡུས་ནས
དེའི་ངོས་སུ་བརྩེ་བ་དང་ཞི་བདེ་ཡི་ས་བོན་གདབ་ངེས
གལ་ཏེ གལ་ཏེ་ཞེས་པ་ཞིག་ཡོད་ན
ངས་འཇིག་རྟེན་འདིའི་མི་སོ་སོའི་སེམས་ཁོང་གི་མི་སྡུག་པ་མ་ལུས་ཐལ་བ་བཞིན་བྲུས་ནས
དེའི་ཚབ་ཏུ་བདེ་སྐྱིད་དང་འོད་སྣང་གི་ཡིག་འབྲུ་བརྐོ་ངེས