མཐའ་མི་མངོན་པའི་དཀྱིལ་འཁོར་ནག་པོ།

མཐའ་མི་མངོན་པའི་དཀྱིལ་འཁོར་ནག་པོ།


                                             འཚིག་རོ། (པེ་ཅིན)
མཚན་སྨག་ནི་བྱི་ལ་ནག་པོ་ཞིག་གི་ཟོལ་གྱིས་འཇབ་ཡོང
ཐང་ག་ཞིག་ལྟར་ལྡེབས་ངོས་སུ་དཔྱངས་པའི་མེ་ལོང་དུ
སྔོ་བསངས་ཀྱི་ནམ་མཁའ་གཡའ་དག་པ་ཞིག་ཤར
འཕུར་བསྐྱོད་ལ་འཁྲེང་བའི་བྱ་ཁྱུ་ཞིག་གི་གཤོག་རུ་མངོན
ཉི་འོད་འཁྱིལ་བའི་མཐའ་ཀླས་ཀྱི་མཚོ་འགྲམ་ཞིག་མངོན
འཛུམ་གྱིས་རབ་ཏུ་མྱོས་པའི་མི་ཚོགས་མང་པོ་སྣང
ཁ་བས་ཡང་ཡང་བསེད་པའི་སྐྲ་ལོ་རིང་བོ་ཞིག་འགུལ
རེག་བྱས་ཟིན་ཐབས་མེད་པའི་ཟླ་འོད་ཀྱི་ཉག་མ་རེ་ཡང་འཕྲོ

སྐབས་འདིར་ང་སླར་ཡང་ལམ་ལ་ཆས་འགྲོ
མེ་འཁོར་འདིས་ང་རང་ཅ་ལག་ཅིག་གི་ཚུལ་གྱིས
གྲོང་ཁྱེར་ཞིག་ནས་གྲོང་ཁྱེར་གཞན་ཞིག་ལ་བསྐྱལ་སྲིད

རླབས་བཞིན་འཕྱོ་བའི་རྒྱུས་མེད་ཀྱི་མི་ཚོགས་ཀློང་ནས
ངས་སྣང་བར་སྣུམ་བཞིན་སིམ་པའི་མི་ཞིག་དྲན་སྲིད
སོ་སོའི་སྙིང་མགོར་སེན་འབྲད་བྱེད་སྟངས་ཀྱིས
སྐྱོ་བའི་སྨུག་ཀློང་དུ་མགོ་བོ་སྲིང་ཚུལ་གྱིས

ངས་རྒྱང་རིང་གི་བདེ་སྐྱིད་མཐོང་སྲིད་དམ

ཚ་བས་གདུང་བའི་དབྱར་གཞུང་ཞིག་ལ
བདེ་སྐྱིད་ནི་རླུང་དང་ཆར་བའི་བྱིལ་བྱིལ་ཇི་བཞིན
སུས་ཀྱང་མྱོང་ཐུབ་པ་ཞིག་གཞར་ཡང་ཡིན་མི་འདུག

ཡང་སྙིང  སུ་ཞིག་གིས
དབུལ་ཕོངས་ཀྱིས་རལ་གྱིན་པའི་རྣམ་ཤེས་མང་པོའི་གཟུགས་མཐོང་ངམ
ས་རུ་འགྱེལ་བའི་གྲིབ་རིས་དག་གི་སྒྲ་ཐོས་སམ
སྐྱོ་ངལ་གྱིས་འཚིག་གིན་པའི་སེམས་པ་མང་པོའི་དྲི་གཟུང་ངམ
ཡུགས་ས་མའི་བརླ་སྒོ་ན་བཞུར་བའི་ཁུ་ཁྲག་གི་རོ་ཚོར་རམ
གློག་བཞིན་འཁྱུག་པའི་འཆི་བདག་གི་སྲོག་རྩར་རེག་ཐུབ་བམ

རྡོག་ཁྲེས་ཤིག་ལྟར་རྒྱ་ཁར་བཞག་ན
སྙན་ངག་པའི་བདེ་སྐྱིད་དང་སྡུག་བསྔལ་གང་གིས་ལྕི་འམ
སྤར་མོས་ཟིན་ཚད་ཀྱིས་ཚིག་དང་ཐ་སྙད་བཏུས་ཀྱང
རུས་རྐང་གི་སྐྱོ་གདུང་ནག་པོ་སེལ་ཐབས་དཀའ་ཨང

མཚན་སྨག་ནི་བྱི་ལ་ནག་པོ་ཞིག་གི་ཟོལ་གྱིས་འཇབ་ཡོང
ཐང་ག་ཞིག་ལྟར་ལྡེབས་ངོས་སུ་དཔྱངས་པའི་མེ་ལོང་ལས
སྐྱོ་གཉེར་བབས་པའི་ངོ་གདོང་ཐེད་པོ་ཞིག་གྲུབ
ཁེར་རྐྱང་གིས་བསྣད་པའི་མིག་ཟུང་ཆ་གཅིག་མངོན
དར་ལྕེའི་སྟེང་གི་སྔགས་ཡིག་བཞིན་འབོར་ཐབས་མ་རྙེད་པའི
དཀྱིལ་འཁོར་ནག་པོ་མཐའ་མི་མངོན་པ་ཞིག་ཡང་ཡང་མངོན

ཀྱེ  སྐྱོ་གདུང་ཁོ་ན་ང་ཚོའི་ཐེར་ཟུག་གི་ནོམ་པ་ཡིན་ཨང

                                                2015.7.3