གོས་ཐགས་བཟང་དེ།
ཀླུ་འབུམ་ཚེ་རིང་། (མགོ་ལོག)
གོས་ཐགས་བཟང་དེ
བཀྲག་མདངས་ལམ་ལམ མཉེན་ཤིག་ཤིག
གོས་མིག་ལ་རན་པ་དེ སུ་ལ་ཡང་འཇམ་ཞིང་མཉེན་པ་དེས
གྲལ་མགོ་ལྗིད་ཀྱིས་མནན་པ་ནས
མི་ཡུལ་གྱི་མུན་པ་ཇེ་སྲབ་ནས་ཇེ་སྲབ འཁོར་བའི་ཁངས་ཆར་ཇེ་ཉུང་ནས་ཇེ་ཉུང
གོས་འདིའི་ཐོག་ན་དབུགས་ཐོགས་པའི་གླུ་ཞིག་ཉི་འོད་བཞིན་འཚེར་བས
སྣོད་མ་ལུས་བཅུད་ཀྱིས་ལྟེམས་སེ་ལྟེམ
གདོང་ཚང་མ་འཛུམ་མདངས་ཤིགས་སེ་ཤིག
གོས་ཀྱི་མཛེས་པ་མཁར་གྲུ་བཞིས་བསྐོར་བའི་གཞིས་ཀས་ག་ལ་ཁོགས
ཞིང་ཁ་ན་མཛེས རྫ་འདབས་དང་སྤང་ཁུད་ན་རླུང་བུ་བཞིན་རྒྱུ
རི་རྩེ་དང་བྲག་གསེབ་ན་དར་ལྕོག་བཞིན་བསྐྱོད
མིག་གིས་མི་ཟིན་པའི་ས་རྡུལ་དག་ཐགས་རྐང་དུ་ཤུགས་ཀྱིས་འཚང་བར
ཇི་ལྟར་སྤྲུགས་ཀྱང་ཐོག་མའི་ཁ་དོག་གང་ཞིག་ལ་ཡལ་གྱིན་འདུག
ཉི་རྡུལ་གྱིས་ཟོས་ཤིང ཆར་རྡུལ་གྱིས་གཏུབ་པས
གོས་ཆ་ཚང་འདི་ཡུན་གྱིས་གོང་ནས་རལ འདབས་ནས་རྙིངས མཐའ་ནས་ཟད
དཀྱིལ་ནས་ཟགས་པ་ན ཧྲལ་ཧྲུལ་ལྷམ་པ་རུ་གྱུར
མལ་དུ་འབྱར་བའི་ལྷམ་པ་འདི་ལྷེམ་ལྷེམ་འདར་མཐར
གང་ཞིག་ལ་བསྣུབས་ཏེ་མི་མཐོང་བར་གྱུར
འོན་ཏེ་མཁར་སྟེང་ནས་འཕྱུར་བའི་སྔོ་ལྷོག་ལྷོག་གི་དུད་ཞགས་དེ་མཐོང་ན
གོས་བཟང་བོ་དེའི་དབུགས་རྒྱུན་ཤུལ་དུ་ལུས་པ་ཚོར་ལ
མི་ཚོས་གོས་གང་གླེང་ཞོར་དུ་ས་ཆུ་མེ་རླུང་གིས་སླར་ཡང་གོས་གསར་བ་ཞིག
ཐགས་སུ་སྐྲུན་གྱིན་པའི་ཡིད་ཆེས་ཀུན་ནས་རྙེད
2016.2.27ཕ་ཡུལ་ནས།
ངའི་སྐྲ་ལོའི་གསེབ་ཏུ་གླུ་ཞིག་གྲག་འོངས།
ལན་བུ། (ལན་གྲུ)
ཁྱོད་ཀྱི་མིག་ནང་དུ་དངོས་པོ་ཞིག་མར་ལྷུང་གིན་འདུག
དེ་ནི་དབྱིབས་དང་ཁ་དོག་མེད་པ་ཞིག་རེད
ཡང་ན དེའི་དབྱིབས་དང་ཁ་དོག་ནི་ཁྱོད་རེད
ཁྱོད་ཀྱི་རྩུབ་རེག་གི་ལག་པས་རོལ་མོ་ཞིག་འཁྲོལ་གྱིན་འདུག
དེའི་ལྗིད་ཚད་ནི་མིག་ནང་གི་མེ་ལྕེ་དང་ལྡོག་ཏེ་འཁོར་གྱིན་ཡོད
དཔེར་ན འོད་དང་གྲིབ་མ་གཉིས་ཀྱི་བསྡུར་ཚད་ལྟར
གསོན་པའི་དུས་ཚོད་ཀྱི་ནང་དུ་འཚང་ག་ཤིག་ཤིག་བྱེད
ཁྱོད་ཀྱི་རྐང་པ་གཉིས་དུས་ཚོད་ཀྱི་ནང་དུ་སྤོ་བཞིན་འདུག
དེ་ཡིས་ཧ་ཅང་འཁྱག་པའི་རླུང་ལ་སྨོན་དུ་བཅུག་སོང
འོན་ཀྱང ཁྱོད་ཀྱི་རལ་གྲིའི་རྣོ་དབལ་གྱི་འདབ་མའི་སྟེང་དུ
ཞེ་འཁོན་གྱི་མེ་ཏོག་ཡང་ཡང་བཞད་ཡོད
ཁྱོད་རང་འཕྲད་པའི་བྱ་དངོས་ཚང་མ་ནི་ཕྱེད་ཀ་རེ་རེ་རེད
དེ་དག་རང་གི་ཕྱེད་ཀ་དང་དུས་མཉམ་དུ་བཞག་ཚེ
ངའི་སྐྲ་ལོའི་གསེབ་ཏུ་གླུ་ཞིག་གྲག་འོངས
གླུ་དེའི་ནང་དུ་དངོས་པོ་ཞིག་འཕྲེད་ཐིག་སྟེང་བསྡད་ཡོད
དངོས་པོ་དེ་ནི་ཁྱོད་རེད
2016.11.24
གོས་ཐགས་བཟང་དེ།
རྩོམ་པ་པོ། ཀླུ་འབུམ་ཚེ་རིང་། (མགོ་ལོག)