ས་དམར་གྲགས་པ། (ལྷ་ས)
སྒོ་རྟགས་མེད་པའི་ནད་ཁང་།
ནད་ཁང་འདིའི་ནང་དུ་ཆ་སྒམ་དང་གཡོས་ཁང་མེད་ལ
མེ་མདའ་དང་སྒྱོགས་ཆེན་ཡང་མེད
སྒོ་གཅིག་ཡོད་པ་དེ་ལས
ཕྱི་ནང་གཉི་ག་མཐོང་ཐུབ
༢༠༡༧.༣.༩ལྷ་ས།
ཡི་གེ་མ་ནིང་དེ་དག
ཆུ་ལ་བསྡེབས་པའི་འོ་ཕྱེ་དེ་དག་ལས་མར་ཐོན་པ་མ་རེད
ཤོག་བྱ་དེ་བྱ་རྒོད་མ་ཡིན་པའང་བདེན་པར་གྲུབ
ལག་པ་འགུལ་ཙམ་གྱིས
སངས་རྒྱས་ཞིང་ཁམས་འདི་ནས་འདྲེན་ནུས་པ་མ་རེད
ནགས་ནས་ཁྱི་རོ་ཞིག་རྙེད་པ་དེ་ཡང
སེང་གེ་ཞིག་ཤི་སོང་བ་དེའི
རྔ་མ་རེད
༢༠༡༧.༣. ༢༢ལྷ་ས།
ཤོག་ངོས་ཀྱི་རྣམ་ཤེས།
མགྲིན་པ་རྨོས་ཤུལ་ཏུ་བཏབ་པའི་ལོ་ཏོག་གི་ས་བོན
མིག་འབྲས་བཀོག་ཤུལ་ཏུ་སྦྱར་བའི་གཡུ་ཆུང་གི་ཕྲ་རྒྱན
སངས་རྒྱས་སེམས་ཀྱིས་གསོས་པས
སྒྲ་ཡི་ཤུན་སྐོགས་རུལ་སོང
༢༠༡༧.༣.༢༧ལྷ་ས།
ཚྭ་ཁུ་མེད་པའི་ཐུག་པ།
ཚིག་མཛོད་ཀྱིས་སྙན་ངག་ཀློག་བཞིན་པའི་དབུགས་ཀྱི་མཆུ་ཏོ་དེ་དག
རྡོ་བ་དང་སྒྲ་ལས་ཡལ་སོང་བའི་ངག་གི་རོ་ཤུན་དེ་དག
རྐང་འབོབ་ཕུད་མ་ཐུབ་པར་ལུས་པའི་སྤྲིན་པ་ཞིག་དང་འདྲ་བར
རྨི་ལམ་གྱི་རྩིག་ངོས་ནས་ཐལ་བར་གྱུར
༢༠༡༧.༣.༣༠གཡོས་ཁང་དུ་གྲུབ།
རྙིང་ནས་གསར་བ་མ།
འགྱུར་རྡོ་ཆ་ཞིག་ལས་ས་ཁྲ་ཞིག་རྙེད་རྗེས
ནགས་ཚལ་ཞིག་མེར་བསྲེགས་པའི་ཐལ་བ་སྤར་མོ་གང
རྒྱ་མཚོའི་འཇིངས་པ་ནས་ལུས
རྡོ་བརྐོས་རི་མོ་ཞིག་ལས་བཀོག་པའི
ཤ་ཟ་མཁན་གྱི་ཉ་མོ་སྐོར་ཞིག་ལ
ལུས་ཀྱི་འཁོར་བ་ལས་བབས་པ་མ་ཡིན་པའི
རུས་པའི་ནང་གི་རྣོའང་མ་ཡིན་པའི
རྡོ་བའི་རྗེས་ཤུལ་ཙམ་ལས
རྙིང་ནས་གསར་བ་མ་ཡིན་པའི
གསང་རྒྱ་ཅི་ཞིག་ཡོད
༢༠༡༧.༤.༧ གཡོས་ཁང་དུ་གྲུབ།
དུས་ཚོད་ཀྱི་འཚེམ་བུ།
ཚིག་གི་བུད་ཤིང་བཏུས་ནས་གཡོས་ཀྱི་སྦྱོར་བ་ཙམ
ནས་འབྲུ་ལྟ་བུའི་སྣང་བ་དེ་ཡང་འགུལ་ཙམ་བྱས
བྲང་ངོར་འཐིབས་པའི་སྨུག་སྤྲིན་དེ་ཡི་ནང་རོལ་ཏུ
གཡུ་ཆུང་དྲུག་དཀར་ཆ་ཞིག་སྦས་མོད་ཀྱང
དངུལ་དཀར་ཕྲ་གདན་མེད་པའི་ལག་སྟོང་ང་རང་སྡོད་ས་ཡི
ལུས་ཀྱི་ཁང་པ་གང་དེ་ལྷག་ཡོད་དམ
ཆང་མས་ཁྲུང་རྐྱན་ལག་ནས་མ་ཤོར་གོང
མིག་གི་ནང་དུ་བྲིས་པའི་རི་མོ་དེ
མགྲིན་པའི་ནང་ནས་བཀག་སྟེ་མིག་ལ་བཤམས
དེ་ཡི་མཐའ་རུ་རུས་པའི་མེ་ཁ་གསོས
རྭ་ལས་སྐྱེས་པའི་སེམས་པ་དེས
མེ་ཡི་ནང་དུ་གར་ལ་རོལ
ཆུ་ལ་གླན་པའི་ལྷན་པ ངག་གི་སྐུད་པས་མ་ཟིན
ཕྱི་ཤུན་གསོན་བཤུ་མ་བྱེད ནང་གི་ཁ་རླངས་འཁྱག་འགྲོ
སྐར་ཁུང་ནང་ནས་བཏུས་པའི་གཟི་ཁྲ་དེ
ཁབ་ཀྱི་རྩེ་མོར་བཞེངས་པའི་དཀྱིལ་འཁོར་ཞིག
སེམས་པ་ཉི་མར་ལྡེ་ཡང
སྣང་བ་ཡིད་ལ་སིམ་སོང
ལྕེ་རྩ་ཚིག་གིས་བསྐམས་ན
སྣང་བའི་སྐུད་པ་རྙེད་དམ
༢༠༡༧.༤.༡༦གཡོས་ཁང་དུ་གྲུབ།
འོད་ཀྱི་སྒྲོག་གུ།
ལྷ་ས་ནི་ཨ་མ་ཞིག་གི་ལུས་རྟེན་ཡིན
ཨ་མ་དེའི་ལག་ནང་དུ་ས་ཞིང་ཆེན་པོ་ཞིག་བཏབ་ཡོད
ས་རྡོ་བཞིན་འཕྱར་མི་དགོས་པའི
ལས་ཀྱི་ནས་འབྲུ་དེ་ཡིན
ཁོ་མོ་ནི་རུས་པའི་སྲུབས་ཀ་ན་འོ་མ་བཞིན་བསྐམས་པའི
ངའི་བྲང་གི་སྒྲོག་གུ་དེ་ཡིན
ལྷ་ས་ནི་ཨ་མ་མཛངས་མ་ཞིག་ཡིན
ཆུར་བ་བཞིན་དམུར་མི་ཚར་བའི་སེམས་ཀྱི་མངར་ཆ་དེ་ཡིན
གཡུ་དྲུག་དཀར་མ་དེ་ཡིན
ལྕེ་ཡིས་མྱངས་པས་མ་ཟིན་པའི
སེམས་ཀྱི་འོད་ཟེར་དེའོ
༢༠༡༧.༤.༡༩གཡོས་ཁང་དུ་གྲུབ།
བདེ་གཡང་ལྷ་མོ།
ང་ནི་སྲིད་པའི་དཀྱིལ་འཁོར་ངོས་ཀྱི་དབུགས་རྒྱུ་ཕྲ་མོ་ཞིག
ལྕེ་རྩེའི་མགྲིན་པ་ལྷོད་པོའི་ནང་རོལ་ན
སྨྲ་བཅད་རྡོ་ཡིས་ཚིག་གི་བུད་ཤིང་བཏུས
རྨི་ལམ་ནང་དུ་ཁྱོད་ཀྱི་དྲི་མ་འཁྱིལ
རུས་པའི་འགྲམ་གཞི་བཏིངས
སྣང་བའི་འདམ་ར་བརྩིགས
ལས་ཀྱི་སྒྲོག་གུ་དཀར་པོ
རུས་པའི་ནང་དུ་བསྒྲོགས་ཡོད
སྙིང་གི་མེ་ཁ་གསོས་དང
མེ་རྡོ་ང་རང་བྱས་ཆོག
༢༠༡༧.༤.༢༥ལྷ་ས།
ལྷ་དཀར་མོ།
འཁྲུགས་པའི་ངག་ནས་དབྱར་གྱི་ཆར་བ་བབས
དེ་ཡི་རླངས་པ་རྡོ་བའི་མེ་ལ་ཟགས
མཚན་ལ་གས་པའི་མིག་གི་སྲུབས་ཀ་ནས
མཐོང་ལམ་གཤགས་པའི་རྟ་ཕོ་རི་ལ་ཤོར
གཟུགས་ཀྱིས་དྲུད་པའི་གྲིབ་མའི་ཕུང་བོ་ཡི
གྲེ་བའི་ནང་དུ་བདེ་གཡང་ལྷ་མོ་བྱོན
རླངས་པའི་ཕོ་བྲང་བཞེངས
གྲིབ་མས་སྙིང་ལ་བྲབས
ཉིན་ལ་གཡོས་སྦྱོར
མཚན་ལ་ཆང་བཙགས
དབྱངས་ཀྱི་ཟིལ་བ་ཁྲོམ་ཁྲོམ
ངག་ལ་འཛུལ་ཤོག
༢༠༡༧.༥.༡ལྷ་ས་རུ་གྲུབ།