ཁ་བ་དཀར་པོ།（བདེ་ཆེན）
སུམ་རྩེན་གླིང་།
རྒྱལ་དབང་ལྔ་བའི་དུས་རབས་སྒལ་པར་ཁུར་ནས་འོང་བཞིན་འདུག
ལོ་རྒྱུས་ཀྱི་མིག་ཤེལ་གྱོན་ནས་སྒམ་མདོག་ངང་འོང་བཞིན་འདུག
ང་ནི་གཞན་ཡུལ་ནས་འོང་བའི་རི་དྭགས་ཤིག་སྟེ
ཁྱོད་ཀྱི་འགྲམ་དུ་བཅར་དོན་ནི
རྒྱལ་དབང་ལྔ་བ་དང་ལོ་རྒྱུས་ཀྱི་ཆུ་མོ་འཐུང་བའི་ཕྱིར་རོ
ནག་ཕག་མཚོ།
ནམ་མཁའ་ཕྱེད་ཀ་ལྷུང་རྗེས་ཀྱི་ལྷིང་འཇགས་དང་ཁ་དོག
སྟོན་ཁའི་དུས་སུ་ངས་བརྩེ་བ་སྦས་པའི་རྡོ་ཕུང་འདི་བཤིག་འདོད
ནག་ཕག་མཚོ ཤམ་བྷ་ལ་གང་ན་འདུག
ངས་རི་མཐོ་ས་གཙང་ནས་ཀི་ཞིག་འདེབས་དགོས་བྱུང
དེ་དང་མཉམ་དུ་ཤམ་བྷ་ལ་ཡང་ཁ་གྲག་བྱུང
རང་བྱུང་ཟམ་པ།
རང་བྱུང་ཁམས་ཀྱི་ནགས་རིས་རྒྱང་རིང་ནས་ང་ལ་འབོད་པ་བྱས
ཕ་བོང་འགའ་ཞིག་ཉི་འོད་ཀྱི་མལ་ཁྲིའི་ཁུད་དུ་གཉིད་ལ་ཤོར
ཆུ་ཚན་གྱིས་མགོ་བོ་མཐོན་པོར་དགྱེ་ཞིང་གནའ་བོ་དྲུད་ནས་འོང
ངས་གནའ་བོ་དེ་ལ་ཉན་ཁུལ་བྱས་ཤིང
ལུས་ཀྱི་དྲེག་པ་རང་བྱུང་ཟམ་པའི་སྟེང་དུ་བཞག
པོ་ཏ་མཚོ།
ཁ་བ་ཅན་གྱི་མཛེས་ཀོང་ས་ལ་བཞད་ཤུལ་ཏུ་ལུས་པའི་ཁྱོད་ཀྱི་གཞས་དབྱངས
གླིང་ཕྲན་ཆུང་ཆུང་དེའི་ཁར་གདོད་མའི་ལྷ་སྒྲུང་གི་ཆུ་རགས་བརྩིགས་འདུག
ང་པོ་ཏ་མཚོ་ལ་འགྲོ་དུས་ལྷ་སའི་པོ་ཏ་ལ་བརྗེད་གྲབས་བྱས
ང་པོ་ཏ་མཚོ་ལ་འགྲོ་དུས་བོད་སྐད་ཀྱི་རྟ་ལ་བོད་ཡིག་གི་སྒ་བརྒྱབ་ནས་བུད
ཤེལ་དཀར་གངས་རི།
རྣམ་ཤེས་འཁྱམ་པོ་ཁ་ཤས་དབྱར་གྱི་དུས་སྟོན་ནས་དགུན་གྱི་མངལ་དུ་ལོག
འབྲོག་ས་ཐམས་ཅད་དུས་གཅིག་ཏུ་ངའི་ལག་མཐིལ་དུ་བབས
རྒྱང་རིང་གི་རི་ཚོགས་དག་ནི་རི་མོའི་གཟུགས
ལོ་ངོ་བརྒྱ་ལ་བརྐོ་མ་ཐུབ་པའི་ངལ་དུབ་ཀྱི་ཁྲོན་པ་དག་སུའི་ཡིན
རི་བོའི་རྩེ་མོ་གནམ་ལ་ཟུག
གནམ་གྱི་རྩེ་མོ་ཁྱོད་ཀྱི་འདོད་པར་ཟུག
རྡོ་མཁར་གནའ་གྲོང་།
མེ་ལྕེའི་རལ་བ་དང་རྡོ་བའི་སྣ་ཐག་གིས་གང་ཞིག་མཚོན་པར་བྱེད
མཚན་མོ་ཟ་བའི་འོད་སྣང་གི་གཙང་པོ་དག་གང་གི་ཕྱོགས་སུ་བཞུར
ཤམ་བྷ་ལའི་ཀོང་བུ་ཐོགས་པའི་སྐྱེས་ཆེན་དག་སུ་ཞིག་གི་གླེགས་བམ་དུ་གཟིམས
ཉི་འོད་ཀྱི་ཆུ་ལ་ཐིམ་པའི་བརྡ་ཡིག་དག་སོ་སོར་གྱེས་ནས་གང་ཞིག་མཚོན
༢༠༡༦ལོའི་ཟླ༩པའི་ཚེས༡ཉིན་བདེ་ཆེན་སེམས་ཀྱི་ཉི་ཟླ་ནས།