བྲན།（རྨ་ལྷོ）
རིག་གྲོལ་ཡོན་ཏན་འོ་མའི་མཚོ་ལ་རྟག་ཏུ་རྣམ་པར་རྩེན་པ་ཡི།།
བསླབ་གསུམ་གུར་ཀུམ་མདངས་ཀྱིས་མཛེས་པའི་གསེར་བྱ་ངང་བ་འབུམ་གྱི་སྡེ།།
ཐོས་བསམ་གླིང་གི་ཀུན་གསལ་དབྱིངས་སུ་གཤོག་འགྱུར་དལ་གྱིས་ལྡེམ་པ་འདིས།།
སྔོན་བྱུང་མེས་པོའི་ཤེས་རིག་སྟོང་ལ་སྔོན་མེད་སྟངས་སྟབས་གསར་བ་གནང་།།
ཕུགས་བསམ་གཅིག་གི་སྐུད་པའི་སྣེ་རུ་དབྱངས་ཀྱི་དར་ཚོན་བཏགས་པ་ཡི།།
གཞོན་པའི་རྨི་ལམ་མཉམ་དུ་རྨིས་པའི་དམར་སེར་རིགས་པ་སྨྲ་བའི་ཚོགས།།
སྐྱིད་སྡུག་ལས་ཀྱི་རི་མོ་གཅིག་ལ་ཚོན་རྩི་བྱུགས་པའི་རྩེད་རོགས་དང་།།
འཕྲལ་དང་ཕུགས་ཀྱི་འདུན་མ་འཚོལ་བའི་སེམས་ཀྱི་སྐྱབས་མཆོག་དྭངས་མ་ཡིན།།
སེམས་ཀྱི་སྒོ་དང་སྒེའུ་ཁུང་ནང་ནས་བསིལ་རླུང་དལ་གྱིས་ལྡང་བ་ཡིས།།
ས་མཐའི་སེམས་པ་བརླན་སའི་སྟེང་གི་མེ་ཏོག་ཡང་ཡང་བསྒུལ་བའི་ཚེ།།
རྩྭ་ལྗང་ཟིལ་བའི་མུ་ཏིག་རྡོག་གཅིག་འོད་མདངས་དང་བཅས་འཐོར་ན་ཡང་།།
ཁམས་དང་མོས་པའི་མཛེས་པ་འཚོལ་བའི་ཚེ་གཅིག་ལས་ཀྱི་སྦྲང་ཆུང་ཡིན།།
རླུང་གིས་བསྒུལ་བའི་ལྕང་མའི་ཤུགས་སྒྲ་ཐོས་འཛིན་བུ་གར་འཛུལ་བའི་ཚེ།།
ཆུ་ཁུར་དང་བཅས་རི་རབ་འདར་བའི་ངང་ཚུལ་སྒྱུ་མའི་གར་སྟབས་ཀྱིས།།
གཤོག་པ་ཐོགས་པའི་རྒོད་པོ་ཁྱུ་ཞིག་ཟོལ་གྱིས་དཀྲོགས་པའི་ལོ་ཟླ་རེར།།
རྣམ་དཔྱོད་ཟླ་བའི་མཛེས་སྡུག་ཡོངས་རྫོགས་དུས་ཀྱི་ཐུབ་བསྟན་འཛིན་ལ་འདུད།།
༢༠༡༧.༥.༡༢ཉིན་གྱི་ཉིན་ཐོ་ལས་བཤུས།