མདོར་ན། དབྱར་ཟླ་འདི་ལ་ལྷག་ཏུ་དྲན་བྱུང་།
མགར་ཡན་མ།（མགོ་ལོག）
གྲིབ་མ་སྐམ་པོ་འདི་དག
སྡོང་བོ་འཁྱག་པ་འདི་དག
ཉི་མས་ཁྲིད་པའི་ངའི་རྣམ་ཤེས་ཀྱི་རྩིག་ངོས་སུ་བཞུར་བྱུང
ཉི་མ་འདི་དག་ལ
ལམ་འགྲམ་དུ་མེ་ཏོག་སྣ་ཚོགས་བཞད་འདུག
ཁོམ་པ་ཡོད་དུས་ཀྱི་ཉིན་གུང་ཞིག་ལ
རི་དྭགས་རྨས་མ་འགའ་ཡང་ངའི་ཁེར་རྐྱང་གི་རྩྭ་ཐང་བརྒལ་ནས་ཞོགས་སོང
ནམ་མཁར་འཕུར་བའི་ལྷ་ཚོགས་ཀྱི་རྡོག་སྒྲ
ཆེད་དུ་ཁྱོད་ཀྱི་སྲང་ལམ་དུ་གྲག་དགོས
ད་ནི་ཁྱོད་ལ་འདོད་ཆགས་མཆོད་དོ
ཁྱོད་རང་ཧ་ཅང་དྲན་དུས
འཁོར་བའི་སྙན་ངག་དག་བྱེ་ཐང་དུ་བཤམས་ནས
རེ་རེ་ལ་སྒྲོལ་དཀར་ཟེར་བའི་མིང་རེ་འདོགས་དགོས་པ
དེ་དུས་འུ་གཉིས་ལོ་ཆུང་བས་ཡིན་ལ
ལག་པ་འདི་ཐེངས་གཅིག་སྲིང་ཆོག་ན
རྩེད་ར་འཁྱགས་པ་དེ་ཚོར་ཡང་ཡང་རེག་ཆོག་པ་ཨེ་རེད
བོད་ལྭ་རྙིང་བ་ཞིག་ཀྱང་ཁྱོད་ཚང་གི་ཆོན་ཐག་མགོར་ཉི་མར་ལྡེ་དུས
ང་ཐེངས་ག་ཚོད་ལ་འཕུར་ཡོད་པ་ཨེ་ཤེས
མདང་ནུབ་གློ་བུར་དུ་སད་བྱུང
རྨི་ལམ་ནང་གི་ནགས་ཚལ་ཞིག་ནས་ངང་ངུར་ཆ་གཉིས་འཕུར་ཏེ
ངའི་མིག་མདུན་གྱི་ཐང་ག་དེར་འཐམ་ལ
ཐང་གར་ང་རྒྱལ་གྱིས་གོམ་པ་སྤོ་ཙམ་བྱས
ཅི་ཡང་མི་འཁྱོངས་པའི་ཉིན་འདི་དག
ངའི་རྐང་རྗེས་སུ་ཡང་ཁྱོད་ཀྱི་ཕུང་བོའི་ཆ་ཤས་དེ་དག་དོད་ལ
ངས་དེ་དག་རེ་རེ་བཞིན་རྡོག་བརྫིས་གཏོང་གིན་འདུག
ཁྱོད་རང་བརྗེད་ག་ལ་ཐུབ
གོས་ཆེན་གཡུང་དྲུང་མ་ཞིག་ཀྱང་བརྗེད་ག་ལ་ཐུབ
མདོར་ན དབྱར་ཟླ་འདི་ལ་ལྷག་ཏུ་དྲན་བྱུང