ལུང་དུ་བསྟན་པ།
ཧི་ཆིས་ཧྥེང་གིས་བརྩམས།
གངས་རྡེའུ་ཡིས་བསྒྱུར། (ཟི་ལིང)
ཡ་ཆུང་སྙིང་གི་འཕར་ལྡིང་སྐྱེན་པའི་ཉིན་མོ་དེ་ནི་གཞི་ནས་སླེབས།།
ཁྱོད་ཀྱི་མཚན་མོའི་དངན་པ་ལྟ་བུའི་གོམ་སྒྲ་དེ་ནི་ཉེ་བར་འོང་།།
ནགས་ཀྱི་ལོ་མ་རླུང་གིས་སྒུལ་བའི་འུར་སྒྲ་དེ་ནི་མ་ཡིན་ཞིང་།།
ཤྭ་ཆེན་རྨིག་གིས་སྔོ་རྩྭ་བརྫིས་པའི་སྒྲའང་མ་ལགས་གསལ་བོར་གོ།
ཁྱོད་ནི་མ་འོངས་ལུང་བསྟན་ནང་གི་སྐུ་ན་གཞོན་པའི་ལྷ་དེའམ།།
དངུལ་དྲིལ་ལྟ་བུའི་གླུ་སྐད་ནང་ནས་བདག་ལ་ལན་གྱི་འཛུམ་པ་སྩོལ།།
ཁྱོད་ནི་དྲོད་འཇམ་སྐྱེད་ཀའི་ཚལ་སྟེ་ལྷོ་ནས་འོང་བ་ངེས་པ་འཚལ།།
དེ་ཡི་ཕྱོགས་ཀྱི་ནམ་ཟླ་དག་ནི་སྦས་པར་མི་བྱ་གསོང་བོར་ཞུ།།
དཔྱིད་རླུང་ཕྱག་གིས་མེ་ཏོག་སྣ་བརྒྱའི་འདབ་མ་ཇི་ལྟར་དཀྲོལ་ལགས་སམ།།
རྒྱ་ལྕང་ལྕུག་མའི་ལྗང་ལོའི་ཚལ་དུ་ཁུག་རྟའི་དུངས་ཀ་ཇི་ལྟར་འཇོ།།
བདག་ནི་ཁྱོད་ཀྱི་རྨི་ལམ་ལྟ་བུའི་གླུ་ཆུང་ནང་ན་མིག་ཟུང་ཟུམ།།
ཡིད་འོང་སྣང་བའི་སྒེག་མ་དེ་ནི་ལན་རེར་གསལ་ཅིང་ལན་རེར་མོག །
ངལ་བའི་རྔུལ་ནག་རླུང་གིས་བསེད་པའི་འགྲུལ་བཞུད་མཐའ་མ་འདིར་ཞོགས་དང་།།
རྒྱ་སྟག་ངར་མའི་པགས་ཀྱིས་བྱས་པའི་མི་འཇིགས་གདན་ལ་ཁྱེད་མངའ་ཞུ།།
བདག་གིས་སྟོན་མཇུག་རེ་རེར་བསྒྲུགས་པའི་སྡོང་ལོ་དག་གིས་མེ་འབུད་འཚལ།།
ང་ཡིས་དལ་གྱིས་ངག་ལ་དྲངས་པའི་བདག་གི་གཞས་ཆུང་གསན་པར་ཞུ།།
གླུ་སྐད་དེ་ནི་མེ་འོད་བཞིན་དུ་ཡི་མུག་ནང་ནའང་མགོ་འཕང་མཐོ།།
མེ་ལྕེའི་སྣང་བ་འུར་འུར་མཆེད་པ་དེ་བཞིན་བདག་གི་གཏམ་རྒྱུད་ལབ།།
མདུན་ཕྱོགས་དེ་ནི་མུ་མཐའ་མེད་པའི་གདོད་མའི་ནགས་ཀྱི་སྤྱིལ་བུ་སྟེ།།
སྡོང་རྒན་གཉེར་མའི་ལུས་ཀྱི་སྟེང་དུ་མ་རུང་སྡིག་པའི་ཐིག་ལེ་འཛིན།།
འཆི་གསོན་བར་མའི་མྱ་ངན་ནང་ན་སྦ་ཤིང་དུག་སྦྲུལ་བཞིན་དུ་འཁྲིལ།།
ཤིན་ཏུ་འཛིང་བའི་ཡལ་འདབ་བསྣོལ་མར་སྐར་མའི་འོད་ཀྱང་ཀུན་ནས་དཀག །
དེ་ཚེ་སྙན་གྱི་མཚོ་མོའི་འཇིངས་སུ་ཞེད་པའི་འབྲས་བུ་ལྷུང་བའི་ཚེ།།
ཞབས་ཀྱི་རི་མོ་མདུན་དུ་སྐྱོད་པའི་མི་འཇིགས་གདེང་སྤོབས་སུ་ཡིས་རྙེད།།
ཁྱོད་ཉིད་འཆག་པའི་སྟ་གྱོན་བྱས་ཚེ་ཁོ་བོ་ཁྱོད་དང་བསྡོངས་ཏེ་འགྲོ།།
ང་ཡི་རྐང་པས་ཞི་བ་ཆེན་པོའི་ཕྱི་མའི་མཐའ་དེ་བརྟོལ་ནུས་ཡིན།།
བདག་ནི་བསྙེལ་བའི་གླུ་ཆུང་ལེན་བཞིན་ཁྱོད་ལ་བརྩེ་བའི་དཔྱིད་ཀ་སྩོལ།།
གང་ཚེ་མུན་པའི་སྟ་གྲི་རྣོན་པོས་འུ་གཉིས་སོ་སོར་ཕྱེས་པ་ན།།
ཁྱོད་ཉིད་གདོང་གི་འདབ་མའི་རི་དྭགས་ཁོ་བོའི་མིག་གི་སྤང་དུ་གཤོར།།
ཁྱོད་ཉིད་བདག་གི་གཞས་ཆུང་ལེན་པར་སྙན་གྱི་འདབ་མ་མ་གཡེར་ཅིང་།།
གོམ་ཆུང་ཕྲ་མོ་མདུན་དུ་སྐྱོད་པའི་བདག་གི་མྱ་ངན་མ་ཚོར་བར།།
ས་སྲོད་འདི་ལ་རླུང་བུ་བཞིན་དུ་དལ་གྱིས་ལྡང་ཞིང་དལ་གྱིས་ཆས།།
ཁྱོད་ཉིད་ཞབས་ཀྱི་སྣང་བ་མཐོན་པོ་འདི་རུ་ལྷགས་ཤིང་འདི་ནས་ཡལ།།
སྨྲ་བ་མེད་པར་ཁྱོད་ཉིད་འོངས་ཤིང་སླར་ཡང་དེ་ལྟར་ཟློག་པ་ཡི།།
ལུང་བསྟན་ནང་གི་སྐུ་ན་གཞོན་པའི་ལྷ་དེ་གཞི་ནས་ཆས་སོང་ངམ།།
༢༠༡༧ ༣ཉིན་བསྒྱུར།