ཀར་མེ་གསལ་ལ་མི་གསལ་བ་ཞིག
གངས་ཀྱི་ཟེ་བ་ནས་མངོན་ཆུང་གིས་ལྷམ་མེར་ལྷན་ནེར་འཕྲོས་པས
ངའི་འཇིག་རྟེན་གྱི་རི་དང་གཙང་པོ་ཚ་བེར་བེར་དུ་བཏང
ཡུན་རིང་ལ་ཤི་གསོན་གྱི་གདམ་ང་མ་རྙེད་པས་ཡིན་ནམ
ཡང་ན་རྣམ་ཤེས་ཀྱི་ལྷུམས་སུ་འཁྱིལ་བའི་ཁྲག་དྲོན་ལ་ངར་དང་ཤེད་མེད་པས་ཡིན
དཔུང་བ་ཡར་བརྫེས་ནས་མཚན་སྨག་གི་ཀློང་ལ་དཀར་མེ་འདེགས་མཁན་དག
ང་ཡི་མཐོང་ལམ་ནས་མངོན་བྱུང
མུན་པ་དེ་གང་ན
དཀར་མེ་དེ་གང་ན
མཚན་མོ་དེར
ཁོ་ཚོའི་ཤུབ་ཤུབ་ཀྱི་རླུང་སྒྲའི་ཁྲོད་ནས
མུན་ནག་གཞོམ་པའི་མེ་ལྕེ
ཆུ་ཀློང་གནམ་དུ་འཕྱོ་སྙམ་གྱིས་མཆེད་ཅིང་འཕྱུར
ཆུ་བྲུག
གློག་འཁྱུག
རྦབ་རྒོད་འགྲིལ
གནམ་ལྕགས་ཀྱི་ཚག་སྒྲས་རུབ་ལ་ཉེ་བའི་གངས་ལམ་ཕྱགས
ཤྭ་འོད་ཆེན་པོས་རི་ཀླུང་ཐམས་ཅད་ཁྲག་ཏུ་འཁོལ་སྙམ་བྱས
རྩྭ་ལྗང་དང་གངས་རྡུལ་མང་པོ་ངམ་ནག་གི་སྤྲིན་པ་བཞིན
འུ་ཚོའི་སེམས་ཀྱི་བྱེ་ཐང་ནས་མངོན་ཆུང་གིས་འབུས་འོང་སྲིད་དམ
འདི་ནི་མཉམ་སྒྲོག་རོལ་མོ་ཞིག་རེད
འགྲོས་དལ་ལ་བབ་ལྕི་བའི་མཉམ་སྒྲོག་རོལ་མོ་ཞིག་རེད
ཡང་ན་འདི་ནི་གངས་ཀྱི་རུས་མཛོད་སྤམ་ལ་མཐུག་པ་དེ་རེད
རྣམ་ཤེས་མགར་མཁན་གྱི་སྙན་ངག་པ་དེ་གང་ན
ཐང་རྒོད་དུ་ལུས་པའི་མི་སེམས་ཀྱི་སྣང་བ་ཏུར་ཏུར་བོ་དེ་གང་ན
མཚན་མོ་འདི
རྣམ་ཤེས་མགར་མཁན
ཡིག་འབྲུ་རྒུམ་མཁན
གདོང་འབག་འདོར་མཁན
མེ་ལོང་གཅོག་མཁན
མུན་ཁྲོད་ནས་ཚོར་གདུང་གིས་གཞས་བར་མེད་དུ་གཏོང་མཁན
ངམ་ནག་གི་གཡང་ལ་གཟས་ནས་མཆོང་མཁན
མེ་འོབས་ཀྱི་ཀློང་ནས་རང་ཉིད་དུར་ལ་འདེབས་མཁན
ཅི་ཡང་མེད་ལ་ཅི་ཡང་འཛོམས་མཁན་དག་གི་དུར་ཐང་ཡིན་ཆོག་པར་ཞུ