སྐར་མ14སྟེང
སྤྱི་སྤྱོད་རླངས་འཁོར་དུ་བུད
མི་ལ་ལས་སྒེའུ་ཁུང་ལས་ཕྱི་རོལ་ལ་ལྟ
ཡང་མི་ལ་ལས་ཁ་པར་ལས་འཇིག་རྟེན་ལ་ལྟ
ངས་ཆེས་གྲལ་རྔ་ནས
རོལ་དབྱངས་ཀྱི་ལོ་མ་ཞིག་སྒོམ་ཞིང
ནམ་མཁའ་ཡི་མཆུ་སྒྲོས་ཤིག་དྲན
སྐར་མ17སྟེང
སྤྱི་སྤྱོད་རླངས་འཁོར་གྱིས
འབབ་ཚིགས་སུ་ཐོན་འདུག་ཅེས་བརྡ་བརྒྱབ
དེ་ནི་མཐར་ཕྱིན་སོང་ཞེས་པའི་གསལ་བརྡ་དེ་རེད
སྐབས་འདིར
ཁྱེད་ཚོ་ཞྭ་མོ་གྲུ་བཞིའི་པར་ལེན་དུ་རྒྱུག
ངས་ཁྱེད་ཚོའི་གྲིབ་གཟུགས་སྐྱོགས་ཀྱིས་བཅུས་ནས
ངའི་ཨམ་ཕྲག་ཏུ་ཤག་ཤག་གིས་བླུགས
2
ཉི་མའི་ཕ་བོང
གླིང་རེ་རེ་ཡི་རྒྱབ་རི་དང
མཚོ་རེ་རེ་ཡི་ནོར་བུ་ཡིན་པས
ས་སྲོས་ཀྱི་ཅོག་ཙེ་འཁོར་ལོ་མ་རུ
རང་རང་ས་ནས
རྒུན་ཆང་གི་འོད་སྣང་ཕུལ་ཞིང
གསེར་ཡིག་གི་བསུང་ངད་བཏང
3
བསྡུ་གསོག་ཡོད་ཚད་བརྒྱབ་ཚར་རྗེས
ཅོག་ཙེ་འདི ང་ཡི་ཅོག་ཙེ
གྱེས་བྲལ་གྱི་མིག་ཟུང་དང་འདྲ་བར
ཆུ་དོང་ཟབ་མོ་ཞིག་ཏུ་གྱུར
ཆུ་དོང་ལས་རླུང་བུ་འཁྱག་པ་ཞིག་ཤོར་ཡོང་ནས
ངའི་སྙིང་ལ་བ་སྤུ་གྲངས་མེད་བཙུགས
4
རླངས་འཁོར་ཇི་ལྟར་མདུན་དུ་བསྐྱོད་ན
སེར་ལམ་ལམ་གྱི་ཀེ་ཚེ་མེ་ཏོག
དེ་ལྟར་ཕྱི་སྣུར་རྒྱག
སྐད་ཅིག་སྐད་ཅིག་ལ་དེ་ལྟར་ཕྱི་བསྣུར་རྒྱག
སྐབས་འདིར ཁྱེད་ཀྱིས་ཀྱང
གྲུ་ཚིགས་དྲ་ཁར་འཁེན་ནས
མིག་ཟུང་མ་རྡེབ་པར་ཅེར་ཡོད
5
ལྒང་བུ་དེ་བཀད་མ་ཐག
དེའི་ནང་གི་སྲན་རིལ་དག
སའི་གོ་ལའི་སྒལ་གཞུང་དུ་འཐོར
ཡུན་གྱིས་འགོར་ན
སྲན་མ་ལ་མྱུ་གུ་འབུས་ནས
མྱུ་གུ་ལ་གང་བུ་ཐོགས་ཏེ
སྲན་མ་ཧ་ཅང་མང་པོ་མང་པོ་ཞིག་རྒྱས་སྲིད
6
གྲོག་མས་སྒོ་མོ་རྡུང་ན
འབོལ་ཁྲིའི་བར་སྲིབ་ནས་ཁྱེད་རང་མི་གཉིད
རླུང་གིས་ཤོག་བུ་རྫོགས་ན
ལྕགས་སྨྱུག་རྒྱབ་ཕྱོགས་ནས་ང་རང་མི་བཞའ
ཁྱོད་དང་འུ་གཉིས
ཧྥུར་ཅ་ཆུ་བོའི་གྲུ་འཐེན་གླ་བ་བཞིན
ས་གཞི་དང་བཅས་པ་རྒྱང་དུ་འདྲུད
རྒྱང་དུ་འདྲུད རྒྱང་རིང་ན་རི་ཆུའི་ཕོ་བྲང་འདུག
7
ཁྱེད་ཕེབས་དང འུ་ཚོས
ནམ་མཁའི་སྒོ་སམ་དུ་མཐའ་མཇུག་གི་སྙན་ཚིག་ཅིག་བྲི
"གཟུགས་དང་འོད་ལ་བཀའ་དྲིན་ཆེ
ཤེལ་ཆག་དང་ལྡ་ལྡི་ལ་བཀའ་དྲིན་ཆེ
སྡོང་ལོ་དང་རུས་སྦལ་ལ་བཀའ་དྲིན་ཆེ
བཀའ་དྲིན་ཆེ ངའི་རྗེས་སུ་འདུར་བའི་ནགས་ཚལ་ལ་བཀའ་དྲིན་ཆེ
བཀའ་དྲིན་ཆེ ངའི་སྨིན་མར་བབས་པའི་འབུ་སྦྲང་ལ་བཀའ་དྲིན་ཆེ"
2017.06.20 རེབ་གོང་ནས།