སྒྱུ་མའི་ལྷ་མོར་གསོལ་བ།
ཁྱུང་བཟང་། (རྨ་ལྷོ)
ཡིད་ཀྱི་མཁའ་ལ་རྟག་རྩེན་ཅིང་།།
རེས་མངོན་རེས་སུ་ཡིབ་པ་ཡི།།
ཆོ་འཕྲུལ་གར་གྱི་རྣམ་རོལ་བ།།
ང་ཡི་ལྷ་མོ་གང་དུ་བཞུགས།།
དོ་དགོང་རྨི་ལམ་སྒྱུ་མ་ལས།།
མངོན་སུམ་གཟུགས་སུ་སྣང་གྱུར་ཅིང་།།
དུངས་པའི་དཔུང་བ་འཁྱུད་པ་འདིས།།
མི་ཟད་དགའ་བའི་གཏེར་དུ་བསྒྲུབས།།
ཕན་ཚུན་འཐམ་དང་འཁྱུད་པ་ལས།།
ཡུན་རིང་དྲན་པའི་གདུང་བ་དག །
ངུད་མོའི་དབྱངས་སུ་འཕོས་པ་ནི།།
རླབས་ཕྲེང་རླུང་གིས་བསྐྱོད་པ་བཞིན།།
དེ་མུར་དྲན་པའི་གཤོག་པ་དག །
འདས་སོང་མཁའ་ལ་གཡོབ་པས་ནི།།
མུ་མེད་བརྩེ་བའི་ནགས་ཚལ་གྱི།།
འབྲས་བུའི་ལྗིད་རྣམས་མཐོང་བར་བྱས།།
དེ་དང་ལྷན་ཅིག་འཁྲེང་ཞེན་གྱི།།
ཐག་པ་ཕྱོགས་སུ་འཁྱིལ་བ་ཡིས།།
ཡིད་ཀྱི་ཁྱེའུ་བཅིངས་པའི་དབུགས།།
འབྱིན་རྔུབ་དཀའ་བའི་འཕྲང་དུ་བཀོད།།
དེའི་ཕྱིར་འདྲེན་བྱེད་ཆུ་དང་བཅས།།
རེ་བའི་མིག་འབུར་གཏད་ལགས་ན།།
བརྩེ་འཛུམ་འོད་ཀྱི་དགའ་སྟོན་ལ།།
ལན་གཅིག་འགོད་པའི་སྐྱབས་འཇུག་ཞུ།།
ཁྱེད་ནི་སྨག་ལ་སྒྲོན་མེ་དང་།།
ཆུ་བོའི་གཞུང་ལ་ཟམ་པ་བཞིན།།
ང་ཡི་མི་ཚེའི་འདུ་བྱེད་ལ།།
འབྲལ་མེད་ནོར་བུའི་དངོས་གྲུབ་ལགས།།
ཁྱེད་ནི་དཔྱིད་ཀྱི་རླུང་བུ་དང་།།
ཉི་མའི་སྔོན་གྱི་སྐྱ་རེངས་བཞིན།།
བདག་ཉིད་རྒུད་པའི་འཇིག་རྟེན་ལ།།
རེ་བ་སྟོང་གི་ཟིལ་ཤུགས་ལགས།།
ཁྱེད་འདི་ན་བའི་སྨན་ཡང་ཡིན།།
ཁྱེད་འདི་ཕམ་པའི་མགོན་ཡང་ཡིན།།
བརྩེ་བའི་ཞལ་རས་སྒོམ་བཞིན་དུ།།
འདུད་པའི་ཐལ་མོ་སྙིང་ལ་སྦྱོར།།
དཀར་པོ་ཞལ་གྱི་འཛུམ་མདངས་དང་།།
དགའ་བ་ཚེམས་ཀྱི་འོད་ཟེར་བཅས།།
བདག་གི་མཁའ་ལ་རྟག་རྩེན་པའི།།
མཛའ་བའི་གར་ནི་འཆམ་པར་བྱ།།
རབ་མེད་འཁོར་བའི་ཆུ་ཀླུང་གིས།།
ནམ་ཞིག་བླ་དང་སྲོག་འཁྱེར་ཚེ།།
མི་སྡུག་ཁྲོ་བའི་གཟི་ཉམས་བཅས།།
ཉེ་བར་སྐྱོབ་པའི་བྱ་རྨྱང་མཛོད།།
རབ་མེད་འདུ་འཛིའི་ཆུ་འཁོར་གྱིས།།
ཡིད་ཀྱི་བརྟན་པ་རྙོག་པའི་དུས།།
དྭངས་གཙང་འོད་ཀྱི་རྩེ་དགའ་ཡིས།།
དྲི་མའི་ཁམས་དག་བགྲུང་བར་བྱ།།
དེ་བཞིན་འདོད་པའི་མེ་ལྕེ་ཡིས།།
ལེགས་ཚོགས་རྩ་བ་གཞོམ་ཉིད་ན།།
ཞི་བ་རྡོ་རྗེའི་གྲུ་ཆར་གྱིས།།
ཡངས་པའི་ཞིང་ས་བརླན་པར་མཛོད།།
ཁ་བས་ས་འཛིན་མནན་ཡང་རུང་།།
ཆར་བས་ས་གཞི་བརྫིས་ཀྱང་བླ།།
མི་འགྱུར་དད་པའི་སྙིམ་པ་ནི།།
ནམ་མཁའི་མདངས་ཀྱིས་ཁྱེད་ལ་གཏོད།།
ཁྱེད་སྐུ་པད་མའི་ལྡིང་ཁང་གིས།།
ཉེ་བར་བསྡུས་པའི་གཡུ་སྦྲང་ང་།།
སྒྱུ་མའི་གྲོང་ནས་སྒྱུ་མ་བཞིན།།
ཐུགས་རྗེས་དབྱིངས་སུ་བསྡུ་བར་ཤོག །