རྒུད་ཀྱི་ལེའུ།
བྲན། (རྨ་ལྷོ)
ལི་ཁྲིའི་རྡུལ་གྱི་མདངས་ལྡན་པའི།།
གོས་ཀྱི་ལྭ་བ་གེ་སར་མའི།།
བཅུད་ལ་མཆུ་ཡི་མདུང་ཐུང་གིས།།
སྣུན་པའི་ཕྱེ་ལེབ་ཁྲི་མ་འབུམ།།
སྐབས་དེར་ལུས་མེད་བདག་པོ་ཡི།།
མདའ་ལྔ་སྙིང་ལ་ཕོག་པ་བཞིན།།
ཁྱོད་ཀྱི་སྔོ་བསངས་བུ་མོ་ཡི།།
མདངས་ནི་རབ་ཏུ་འགྱུར་བས་རྒུད།།
ཕུག་རོན་རྩེན་པའི་དགའ་བ་འབུམ།།
རང་གིས་ཡོངས་སུ་མྱོང་བ་བཞིན།།
མེ་ཏོག་ལམ་ལ་ཞུགས་འདོད་པའི།།
མྱོས་པའི་གདོང་གི་ཁ་དོག་འགྱུར།།
དེ་ཚེ་སྲེད་པའི་མེ་རླུང་གིས།།
ཁྱེར་ནས་ནགས་ལ་སོང་བ་བཞིན།།
འདོད་ཆེན་དྲན་ཀས་ཆུ་ཡི་རྡུལ།།
སྲིད་པའི་ལམ་ལ་གཏོར་བས་རྒུད།།
དེ་ནི་དགུང་གི་ཉི་མའི་ཟེར།།
རིང་དུ་དོར་ཏེ་མུན་ནང་གི །
སྒྲོན་མེའི་འོད་ལ་ཆགས་པ་ཡི།།
མེ་ལྕེབ་ཟློས་གར་འཁྲབ་པ་བཞིན།།
འཁོར་བ་སྡུག་གི་ལྭ་ནག་ཅན།།
མཚམས་རེར་སྐྱིད་པའི་ཟོལ་སྟོན་ལ།
སྐབས་རེར་སྡུག་གི་ཉམས་མངོན་ཡོང་།།
སྐྱོ་བའི་མིག་ཆུ་ཅན་དེ་དག །
ནག་ཕྱོགས་སྲིན་པོ་ཁྲོས་པ་བཞིན།།
མཆེ་བ་རིང་བོས་རྣམ་དཀར་གྱི།།
ལས་ལ་བརྩོན་པའི་དྲང་སྲོང་གི །
སྙིང་གི་ཆ་ཤས་ཁྱེར་བ་བཞིན།།
དེ་ཚེ་ཁྱོད་གདོང་ཀུ་ཤུའི་རོ།།
ལོངས་སུ་སྤྱོད་པའི་སྟོབས་མེད་ཀྱིས།།
ཁྱོད་ལ་གང་ཞིག་སྨྲས་པ་དག །
རྨི་ལམ་ནང་གི་སྐད་ཆ་འདྲ།།
གང་ལྟར་ངང་བའི་ཁྱོ་ཤུག་ཟུང་།།
ཀུན་གསལ་མཐོང་ལ་འཕུར་བའི་ཉིན།།
སེམས་རྟེན་བརྩེ་བའི་བརྩམས་ཆོས་སྟོང་།།
གངས་རིའི་ཞིང་ལ་བཀྲམ་པར་མཛོད།།
དེ་རིང་རྒྱང་ལ་གྱེས་པ་ཡི།།
སྲོད་ཀྱི་ཉི་མའི་ཕྱི་མིག་ནི།།
ཁྱོད་ཀྱི་མ་འོངས་མེ་ཏོག་མའི།།
སྙིང་གི་ཚལ་ལ་ཕོག་པར་ངེས།།
བློ་གསལ་བུང་བ་གཤོག་ལྡན་མས།།
རིག་པའི་སྦྲང་ཆང་སིལ་བུའི་ཆ།།
ང་ཡི་སྨྲ་བའི་འབབ་སྟེགས་སུ།།
གཏོར་བའི་ལས་འདི་སྙིང་ལ་སྡུག །
གང་དུ་བཞུར་ཡང་བརྩོན་པའི་གྲུར།།
ཞུགས་ཏེ་ངལ་བའི་ཁུར་གྱི་ཕོན།།
མ་དོར་ཉི་ཟླའི་མཚམས་སུ་བསྐྱོད།།